بیان الاعراب ایک ایسا علمی شاہکار ہے جو متداول عربی کلمات اور ان کے صحیح اعرابی پہلوؤں کو اجاگر کرتا ہے،یہ کتاب باذوق طلبہ اورنوفارغین اساتذہ کے لیے انتہائی معلوماتی اور کارآمد ہے۔

اس کتاب میں کلمات کی ترتیب حروف تہجی کے اعتبار سے ہے ،اس سےطالب علم کو  اپنا  مطلوبہ کلمہ تلاش کرنا اور اس کی نحوی ترکیب معلوم کرنا کافی آسان ہے ۔

اس کتاب میں ایسےمشکل کلمات اور محاورات کا اعراب بھی بیان کیاگیا ہے جن کی نحوی ترکیب سمجھنےکے لیے طلبہ کو کافی دقتوں کا سامنا کرنا پڑتااوربڑی بڑی  کتابوں کی ورق گردانی کرنی پڑتی۔

اس کتاب کی ایک خصوصیت یہ بھی ہے کہ اس میں مندرج  کلمات  کی صرف ایک ترکیب بیان نہیں کی گئی ہے ، بلکہ عموماً کلمات کے مختلف پہلووں کا لحاظ کرکے  اعراب بیان کرنے کی کوشش کی گئی ہے ۔

بیان الاعراب میں ان مغلق مفردات اور مشکل جملوں کو پیش کیا ہے جن کی ترکیبی حیثیت سے نو فارغ علما عموماً اور طلبہ خصوصًا نا واقف ہوتے ہیں، مثلاً  ’’ أَیْضًا،بَیْتَ بَیْتَ،تَارَۃً، حقًّا،اِصْطِلَاحًا،شَرْحًا وَ بَسْطًا،جِدًّا،جَیِّدًا،صَلَّی اللہُ تَعَالٰی عَلَیْہِ وَسَلَّمَ، إِلَامَ‘‘ جیسے سیکڑوں الفاظ ہیں جو گاہے بگاہے عبارتوں میں آتے رہتے ہیں لیکن عام طور پر طلبہ ان کی ترکیبوں سے نا بلد ہوتے ہیں۔

اس میں بعض مقامات پر بیان اعراب کے ساتھ کلمہ کی حقیقت پر بھی روشنی ڈالی گئی ہےاور ترکیب میں  موقع محل کے لحاظ سے کہیں اختصار اور کہیں تفصیل سے کام لیا گیا ہے۔

بیشتر مثالوں کا اردو میں ترجمہ بھی درج کردیا گیا ہے،اس  سے نو آموز طلبہ کو ترکیب سمجھنے میں کافی آسانی ہوسکتی ہے اور کہیں کہیں ترکیب کی وجہ سے ترجمہ سمجھنے میں بھی  مدد مل سکتی ہے ۔